Federata e Basketbollit e Kosovës këtë fundjavë në Marigona Rezidencë organizon turneun në 3×3 për meshkuj dhe femra.

Ekipet fituese në kategoritë përkatëse do ta përbëjnë ekipin përfaqësues të Kosovës që do të marrë pjesë në kualifikimet për FIBA Europe Cup 2021, që sivjet zhvillohen në Constanta të Rumanisë më 26 e 27 qershor 2021.

FBK-ja njofton se në konkurrencën e meshkujve do të garojnë 12 ekipe, kurse në atë të femrave 8 ekipe. Në rast se lajmërohen më shumë ekipe sesa numri i përcaktuar, atëherë përparësi për pjesëmarrje kanë ekipet që kanë pozitë më të mirë në renditjen e FIBA-s.

“Kusht për pjesëmarrje të secilit lojtar në këtë turne është që ta ketë profilin e konfirmuar në platformën e FIBA-s për 3×3 (https://play.fiba3x3.com), t’i ngarkojnë fotot dhe shënimet e kërkuara nga FIBA. Procedura e regjistrimit: pas konfirmimit të profileve për secilin lojtar, ekipet mund të regjistrohen në platformën e FIBA-s (https://play.fiba3x3.com), ose të dërgojnë e-mail në [email protected], ku paraqesin të dhënat e lojtarëve. Afati i fundit për regjistrim: 21 maj 2021, ora 14:00”, thuhet në njoftimin e FBK-së.