Kolegji Zgjedhor i Turqisë ka urdhëruar që zgjedhjet lokale të përsëriten në Stamboll, pas një fitoreje të opozitës në muajin mars.

Partia për Drejtësi dhe Zhvillim e presidentit, Rexhep Tayyip Erdogan është ankuar për rezultatin zgjedhor pasi pretendonte se gjatë zgjedhjeve kishte parregullsi dhe korrupsion.

Kandidati i Partisë Republikane Popullore (CHP), Ekrem ImamogluI, cili nga autoritetet zyrtarisht është konfirmuar si kryebashkiak i Stambollit muajin e kaluar, ka thënë se vendimi i Kolegjit Zgjedhor ishte i ndikuar nga partia në pushtet.

“Ky vend është i mbushur me 82 milionë patriotë që do të luftojnë për demokracinë deri në momentin e fundit”, ka thënë Imamoglu.

“Ne kurrë nuk do të bëjmë kompromis mbi parimet tona”, ka thënë ai një turme njerëzish që ishin mbledhur pas vendimit të Kolegjit Zgjedhor.

Votimi në qytetin më të madh të Turqisë do të mbahet më 23 qershor.

Zgjedhjet lokale në të gjithë Turqinë u zhvilluan më 31 mars dhe u konsideruan si një referendum mbi udhëheqjen e Erdoganit në një situatë kur ekonomia turke është në rënie.

Presidenti Erdogan, i cili ka dominuar politikën turke, prej kur ka ardhur në pushtet 16 vjet më parë, dhe ka udhëhequr këtë shtet me masa secilën herë më të ashpra, ka bërë fushatë intensive për këto zgjedhje, të cilat i ka cilësuar si “çështje të mbijetesës” për Turqinë.