Organizatorët e Lojërave Olimpike “Tokio 2020”, eventi më i madh sportiv në botë, i shtyrë për verën e vitit të ardhshëm si pasojë e pandemisë Covid-19, kanë deklaruar se në këtë Olimpiadë do të lejohet të vijnë dhe garojnë vetëm sportistët që do të jenë negativë nga koronavirusi.

Të gjithë ata që do të hyjnë në Tokio duhet të kenë kryer tamponin të paktën në 72 orët e fundit. Në Olimpiadë zakonisht marrin pjesë 11 mijë sportistë nga 200 vende të botës.

Aktualisht Japonia ka mbyllur dyert për personat që vijnë nga 159 shtete të botës, ku Covid-19 vijon ende të ketë nivel të lartë infektimi. Përveç tamponit, të gjithë sportistët duhet të shkarkojnë një aplikacion në celularët e tyre, i detyrueshëm, i cili do ta monitorojë gjendjen e tyre shëndetësore 24 orë. Ky është një vendim i marrë nga Qeveria e Japonisë. Gjithashtu, asnjë sportist nuk do të lejohet t’i përdorë mjetet e transportit publik gjatë Olimpiadës.