Nënkryetares së Komunës së Zveçanit, Natasa Tomanic i janë djegur dy lokalet e saj.

Zëvendësministri i Ministrisë së Administrimit dhe Pushtetit Lokal, Arbër Vokrri, ka bërë me dije se këtë e kanë bërë banditët, sipas tij në përpjekje për t’i frikësuar serbët e çliruar nga Lista Serbe.

“Banditët ia dogjën dy lokalet e saj zëvendëskryetares së Komunës së Zveçanit, znj. Natasa Tomanic, në përpjekjen e kotë për t’i frikësuar serbët e çliruar nga thundra e terroristëve të Listës Serbe”.

“Kjo vie një muaj pas bllokimit të paligjshëm të biznesit të familjes së zëvendëskryetares së Mitrovicës Veriore znj. Katarina Adzançiq nga regjimi i Vuićit dhe dy muaj pas djegies së veturës së kryesuesit të Kuvendit Komunal të Leposaviqit, z. Gorski Buriq”.

“Terroristët dhe banditët ndihen të trimëruar sa herë që ndërkombëtarët i kërkojnë Republikës së Kosovës të heqë dorë nga sovraniteti dhe zbatimi i ligjit”, ka shkruar Vokrri në “Facebook”.

Ky rast është raportuar edhe në polici, pas mesnate.

“Zveçan 08.03.2024 – 00:45. Ankuesja femër kosovare ka informuar se persona të panjohur i kanë vënë zjarrin butikut të saj, zjarrfikësit kanë shuar zjarrin. Lidhur me rastin ankuesja dyshon se zjarri i është vënë qëllimshëm nga persona të dyshuar. Sipas ankueses, vlera e dëmit është e lartë. Rasti është duke u hetuar”, ka njoftuar Policia e Kosovës.