Kuvendi Komunal i Gjilanit, nën udhëheqjen e Shpresa Kurteshit-Eminit, ka shqyrtuar dhe miratuar të enjten rregulloren për përkujdesjen dhe mbrojtjen e fëmijëve, statutin e Qendrës Kulturore Evropiane, vendimin për plotësimin dhe ndryshimin e kushteve ndërtimore në Zonën “B 4” në kuadër të PRRU “Kodra e Thatë”, vendimin për plotësimin e vendimit të datës 18.09.2017 për ndryshimin  e destinimit të planifikuar në një pjesë të parcelës kadastrale nr. 5206-0, në kuadër të Planit Rregullues Urban “Livadhet e Arapit” në Gjilan, vendimin paraprak për dhënien në shfrytëzim afatgjatë të pronave të paluajtshme komunale, vendimin për formimin e komisionit vlerësues të ofertave.

Është miratuar edhe kërkesa për ndarjen e mjeteve financiare për deshifrimin dhe përkthimin e mbishkrimeve osmane në varreza në regjionin e Anamoravës, të cilin e paraqiti drejtoresha e Kulturës, Deniza Limani, plotësimin e vendimit për ndarjen e lokacionit për vendosjen e shtatores së Qahil Agushit në Zhegër, duke i specifikuar parcelat, përkatësisht vendimin për lirimin e bizneseve nga pagesa e taksës komunale për vitin 2021.

Po ashtu, Kuvendi u informua edhe për suksesin e nxënësve në gjysmëvjetorin e parë të vitit shkollor 2020-2021 dhe fillimin e gjysmëvjetorit të dytë.

Sa i përket emërtimit të rrugëve dhe rastit konkret në lagjen Smakaj në Cërnicë, nënkryetari i komunës, Arbër Ismajli, ka thënë se ankesa për ndërrimin e emërtimit fillestar nuk është bërë në afatin e caktuar ligjor. “Është e vërtetë që parashtruesi i ankesës ka vendosur tabelën, por ne kemi qenë të detyruar ta heqim atë, sepse ka pasur reagime të banorëve, meqë rruga ka qenë e emërtuar në bazë të procedurave të rregullta ligjore”, ka thënë ai.

Në lidhje me zhdëmtimin e pasojave nga vërshimet, Ismajli ka sqaruar se vlerësimi është bërë sipas kërkesës së ministrisë, por deri tani nuk ka asgjë zyrtarisht sa i përket kompensimit. “Personalisht nuk jam optimist për këtë ndihmë sepse, sa kam dëgjuar, është një fond prej një milionësh që qeveria e ka ndarë, ose ka menduar ta ndajë, derisa vlera e dëmit vetëm në Komunën e Gjilanit shkon në 1.5 milion euro”, është shprehur Ismajli. Kurse sa iu përket investimeve në infrastrukturë, ai u shpreh i bindur se asnjëherë dhe askund nuk është bërë ndasi politike, megjithëse ka ndonjë vend ku ende nuk kanë mundur të arrijnë investime.