Zyrtarë të Lidhjes Demokratike e Kosovës (LDK) kanë kritikuar programin e Qeverisë së Kosovës për politikën e jashtme.

Nënkryetarja e kësaj partie dhe koordinatorja e departamentit për politikë të Jashtme, Shqipe Mjekiqi, ka thënë se programi i qeverisë është sipërfaqësor, shkruan “Epoka e re”.

Mjekiqi ka thënë se Lëvizja Vetëvendosje ka ndryshuar qëndrime ndaj shumë çështjeve prej se ka ardhur në pushtet.

“LDK-ja e konsideron të rëndësisë të jashtëzakonshme konsolidimin e politikës së jashtme të Kosovës. Përfaqësimi i interesave të qytetarëve të Kosovës duhet të jetë prioritet për secilën qeveri, por programi i qeverisë për politikën e jashtme është i natyrës dëshirore. Me një fjalë, s’ka strategji, s’ka plan veprimi. Programi nuk përmban asnjë fjalë për anëtarësimin e Kosovës në Këshillin e Evropës, Interpol e të tjera. Qeveria ka mungesë të strategjisë për njohje të reja. Qeveria nuk e shpjegon se si do të arrihen fondet e IPA-s. Nuk ka strategji as për anëtarësimin në Bashkimin Evropian. Ne e konsiderojmë që procesi i heqjes së vizave për qytetarët e Kosovës është i vonuar. Bashkëpunimi me Shqipërinë përmendet në vetëm një paragraf, ndryshe nga premtimet gjatë zgjedhjeve të cilat nuk po konkretizohen”, ka thënë Mjekiqi në një konferencë për medie.