Pas procesit paraprak bashkëpunues përgatitor, sot u zyrtarizua partneriteti bilateral në mes Republikës së Kosovës dhe Mbretërisë së Jordanisë në fushën e mbrojtjes, raporton “Epoka e re”. 

Memorandumi i mirëkuptimit u nënshkrua në distancë për shkak të rrethanave  të krijuara nga pandemia Covid-19, nga shefi i shtabit të përgjithshëm të Forcave të Armatosura të Jordanisë, gjeneralmajor Yousef A. Alhnaity, në emër të palës jordaneze dhe komandantit të FSK-së, gjenerallejtënant Rrahman Rama, me autorizim dhe të ministrit Quni, në emër të Ministrisë së Mbrojtjes së Republikës së Kosovës.

Si marrëveshja bilaterale e 15-ta më radhë e bashkëpunimit të Republikës së Kosovës me vendet tjera në fushën e mbrojtjes, ka për qëllim bashkëpunimin në fushat si:  luftën kundër terrorizimit, operacionet paqeruajtëse dhe humanitare, arsimimin dhe stërvitjet ushtarake, hulumtimin në industrinë e mbrojtjes si dhe shkëmbimin e përvojave në nivel ekspertësh.