Ministri i Kulturës, Rinisë dhe Sportit, Kujtim Gashi, ka pritur të martën në takim kryetarin e Komunës së Kamenicës, Qëndron Kastrati.

Në këtë takim, ministri Gashi e kryetari Kastrati kanë nënshkruar memorandum bashkëpunimi për mbështetje financiare për projektin “Kompleksi Rexhep Malaj” në fshatin Hogosht.

Memorandumi do të zbatohet gjatë vitit 2018, projekt për të cilin MKRS-ja do të investojë me vlerë financiare prej 50 mijë euro.

Ministri Gashi ka thënë se këto investime po bëhen me qëllim të ruajtjes së vlerave të trashëgimisë kulturore.

“Si MKRS zotohemi se do të angazhohemi maksimalisht që të investojmë në fushën e kulturës e të trashëgimisë”.

Ndërkaq kryetari i Komunës së Kamenicës, Qëndron Kastrati, ka shprehur falënderim të veçantë për ministrin për përkushtimin e vazhdueshëm në sektorin e kulturës, rinisë, sportit e trashëgimisë për qytetarët e Kamenicës por edhe për nënshkrimin e këtij memorandumi.

Kastrati ka thënë se kompleksi do të jetë në shërbim të kujtesës për qytetarët e Kamenicës dhe jo vetëm.

/Epoka e re/