Kryetari i Kuvendit të Kosovës, Kadri Veseli, i shoqëruar nga ministri i Shëndetësisë, Uran Ismaili, ka marrë pjesë në ceremoninë e nënshkrimit të Udhëzimit për rregullimin e çmimit të produkteve medicinale.

Me këtë udhëzim administrativ, Kosova do të kursejë miliona euro, ndërsa pacientët do të kenë mundësi t’i marrin barnat e nevojshme në gjitha barnatoret e Kosovës me të njëjtin çmim.

Këtë të arritur të Ministrisë së Shëndetësisë, kryeparlamentari Veseli e ka quajtur historike.

“Me këtë qeverisje të ministrit me bashkëpunëtorë dhe me këtë pjesë të reformave po dëshmohet se kur ka vizion dhe ka qëllim të mirë, mund të kemi sukses. Do t’ia arrijmë këtij suksesi. Askush nuk mund të na ndalë. Do të kemi pengesa dhe vështirësi në rrugëtimin tonë për arritjen e qëllimeve tona për shtet ligjor, përmirësim të jetës së qytetarëve e integrim në Bashkimin Evropian, por nuk do të ndalemi. Ministër vazhdoni në këtë mënyrë, në një komunikim të veçantë dhe më të intensifikuar me njerëzit profesionistë në sektorin e shëndetësisë, përfshirë edhe farmacistët”, ka thënë Veseli.

Ndërsa, ministri Ismaili, ka deklaruar se këtë reformë e kanë pritur gjatë dhe se me këtë po arrihet një qëllim të cilin janë shumë të kënaqur që po e realizojnë.

Sipas Ismailit gjendja në shëndetësi sidomos në aspektin farmaceutik ka qenë jo e mirë dhe se Kosova bashkë me Bjellorusinë kanë qenë të vetmet shtete që nuk e kanë pasur këtë udhëzimi cili ka mundësuar keqpërdorimin e buxhetit të shtetit.

“Jam shumë krenar që sot, për herë të parë në Kosovë, po nënshkruajmë Udhëzimin Administrativ që rregullon dhe unifikon çmimin e barnave. Ky udhëzim shënon një prej reformave më të mëdha në shëndetësinë kosovare. Duke hapur një faqe të re për shtetin dhe qytetarët, ne do të vazhdojmë të jemi në ballë të përgjegjësive tona publike, me qytetarin në qendër të secilës politikë”, tha ministri Ismaili.

Ismaili ka thënë se në mungesë të këtij dokumenti, deri tani shteti ka blerë mbi 6 milionë euro më shtrenjtë barna spitalore brenda vitit, ndërsa qytetarët kanë shpenzuar nëpër barnatore rreth 10 milionë euro më shumë në vit.

Në anën tjetër, Arianit Jakupi, kryetar i Odës së Farmacistëve të Kosovës, në emër të farmacistëve ka falënderuar ministrin Ismaili për vizionin dhe guximin që të merret me sfida të cilat për 20 vite nuk kanë arritur të adresohen.

“Këtë e dëshmon edhe ky draft udhëzim administrativ për çmime që daton nga viti 2003 nën administratën e UNMIK-ut, e cili asnjëherë nuk e pa dritën e diellit”, ka thënë Jakupi.

Përmes këtij udhëzimi pamundësohet shitja e produkteve me çmime më të larta për barnat që i siguron Ministria e Shëndetësisë dhe gjithashtu shitja në tregun kosovar e barnave me çmime më të larta se sa vlera reale e tyre edhe në tregjet e rajonit.

/Epoka e re/