Nesër, në Ditën e të Dashuruarve, në bibliotekën “Hivzi Sulejmani” në Prishtinë, në lagjen Dardania, në orën 11:00, do të mbahet një takim letrar me poezi kushtuar atdheut (17 shkurtit) dhe dashurisë. Poetë të njohur do t’i deklamojnë vargjet e tyre.

“Duke marrë shkas nga një varg i Azem Shkrelit i poezisë “Bari, s’është bari ynë”, shkruar në vitet ’80 të shekullit të kaluar, ne vendosëm që këtë orë letrare ta quajmë ‘Poezia na kosovoi’. Sipas Shkrelit, poezinë e kishte filluar për Kosovën e frymëzimi kishte kaluar te dashuria (e shoqja).

Jeni të mirëpritur krijues e lexues!”, ka njoftuar biblioteka “Hivzi Sulejmani”.

Azem Shkreli

Bari, s’është bari ynë

Sime shoqe

Bari s’është bari ynë e di edhe Zoti

Nga tërsëllimë e të cilit s’di si mbimë

Çdo gjë që mësuam me gjasë e dinim moti

Dhe vetë i rrahëm orët që do të vinë

Dhe kohë e vëngër tinëzisht na përkoi

Harrimi qoftë i qartë i bukur i vonë

Një dhembje na deshi fort na kosovoi

Do e pimë pikë pikë nga anatema jonë

E pimë të uruarën dhe kupën për fytyrë

Ia derdhim shenjtit tonë me shumë nderim

Është diku në ne një etje që s’pi mëshirë

Na endet gjakut e njelmët e pashërim

Të rrojë ajo etje e këndshme etje shtarë

Nga e cila merret frymë rriten fëmijë

Nëse i dhamë faunës pakëz Kosovë dhe farë

Në një lule hithe do të çelim përsëri

Qiellin përsëri me flatër do ta çeli

Një zog i galëm është zogu ynë i miri

Bari s’është bari ynë Bebi Shkreli

Ata që s’erdhën kot nuk venë pahiri