Kryeministri izraelit Benjamin Netanyahu ka udhëtuar për në Hungari mbrëmë vonë, pavarësisht një urdhërarresti të lëshuar kundër tij nga Gjykata Ndërkombëtare Penale (ICC) për krime lufte në Gaza.

Raportohet se Netanyahu udhëtoi për në Hungari për një vizitë katër-ditore, i shoqëruar nga gruaja e tij Sara.

Human Rights Watch (HRW) i ka bërë thirrje Hungarisë që të arrestojë Netanyahun nëse ai shkel në territorin e saj, shkruajnë mediat e huaja, përcjell Telegrafi.

“Hungaria duhet t’i refuzojë hyrjen kryeministrit izraelit Benjamin Netanyahu ose ta arrestojë atë nëse ai hyn në vend”, tha organizata e të drejtave të njeriut.

Edhe Amnesty International i bëri thirrje Hungarisë që të arrestojë Netanyahun.

Bëhet e ditur se lideri izraelit është planifikuar të takohet me homologun e tij hungarez Viktor Orban.

Ndryshe, Gjykata Ndërkombëtare Penale lëshoi ​​urdhërarrest nëntorin e kaluar për Netanyahun dhe ish-ministrin e Mbrojtjes Yoav Gallant me akuza për krime lufte dhe krime kundër njerëzimit në Gaza.

Izraeli po përballet me akuza për gjenocid në Gjykatën Ndërkombëtare të Drejtësisë për veprimet ushtarake në Gaza, ku më shumë se 50,000 njerëz janë vrarë që nga sulmi i 7 tetorit 2023 nga Hamasi.