Benjamin Netanyahu ka thënë se ka udhëzuar ushtrinë izraelite që të intensifikojë presionin ndaj Hamasit, pasi grupi militant palestinez refuzoi një propozim të përkohshëm armëpushimi.

Në një fjalim televiziv, kryeministri izraelit tha se ndërsa lufta erdhi me një çmim të rëndë, Izraeli nuk kishte zgjidhje tjetër veçse të vazhdonte të luftonte për ekzistencën deri në fitore, transmeton Telegrafi.

Të enjten, Hamasi hodhi poshtë një propozim izraelit për një pauzë të përkohshme në luftime, duke e përshkruar ofertën si “kushte të pamundura”.

Hamasi aktualisht mban 59 pengje, ku 24 prej tyre besohet se janë gjallë. Thotë se do t’i kthejë ata vetëm në këmbim të lirimit të më shumë të burgosurve palestinezë, një tërheqjeje të plotë izraelite nga Gaza dhe një armëpushim të qëndrueshëm, siç kërkohet në marrëveshjen e armëpushimit tashmë të prishur që ishte arritur në fillim të këtij viti.

Vërejtjet e Netanyahu erdhën pasi ministria e Shëndetësisë e drejtuar nga Hamasi në Gaza, tha se sulmet izraelite kishin vrarë më shumë se 90 njerëz në 48 orë.

Gratë dhe fëmijët ishin mes 15 personave që u vranë gjatë natës të premten në qytetin jugor Khan Younis, sipas stafit të spitalit.

Të paktën 11 nga ata që u vranë ishin strehuar në një tendë në zonën e caktuar humanitare të al Mawasi, ku jetojnë qindra mijëra njerëz të zhvendosur, thanë punonjësit e spitalit.

Katër persona të tjerë u vranë në sulme të ndara në qytetin Rafah, duke përfshirë një nënë dhe vajzën e saj, sipas Spitalit Evropian të Gazës, ku u dërguan kufomat.

Izraeli thotë se fushata e tij e fundit është të ushtrojë presion mbi Hamasin për të liruar më shumë pengje, dhe në fund të pranojë të çarmatoset dhe të largohet nga territori.

Për javë të tëra, trupat izraelite kanë bllokuar gjithashtu Gazën, duke ndaluar hyrjen e ushqimeve dhe mallrave të tjera.