Miss Anglia e vitit 2014, e cila u rendit në vendin e katërt në Miss World të atij viti, prej thuajse një viti po punon për gjetjen e një vaksine kundër koronavirusit. Doktoreshë Carina Tyrrell, e diplomuar në Kembrixh, është pjesë e një ekipi në Universitetin e Oksfordit që kreu kërkime thelbësore për vaksinën.

“Para gjashtë vitesh nuk e mendoja kurrë se do të isha pjesë e një ekipi në kërkim të një vaksine gjatë një pandemie globale në këtë shkallë”, thotë ajo, teksa shton se ëndrra e saj e fëmijërisë ishte të trajtonte probleme shëndetësore globale si malaria.

Tyrell thotë se në kohën e shpërthimit të koronavirusit, po punonte në Organizatën Botërore të Shëndetësisë pikërisht për pandemitë. ”Ashtu si shumë studiues në të gjithë botën, të gjithë ndaluan punën që po bënin dhe iu përkushtuan totalisht Covid-19”, tha ajo.

Dr. Tyrrell, e cila humbi një person të afërt nga pandemia, thotë se pavarësisht orëve pa gjumë dhe stresit, fakti që Oksford ka një vaksinë efektive, e bën atë shumë të lumtur.