Anëtari i Kryesisë së Partisë Demokratike të Kosovës dhe sekretari për marrëdhënie me jashtë i kësaj partie, Bernard Nikaj, ka kritikuar qeverinë për krizën energjetike.

Në një konferencë për medie, ai ka thënë PDK-ja për më shumë se tre muaj ka alarmuar për krizën energjetike, ndërsa Qeveria ka dështuar që të ndërmarrë masa karshi krizës.

Sipas tij, qeveria në këtë mënyrë e ka futur vendin në krizë të thellë energjetike.“Duke e ditur profilin tonë të konsumit si dhe kapacitet e limituara të gjenerimit sidomos për periudhën e vjeshtës dhe dimrit për të mbuluar kërkesën për konsum, deklarimet e kësaj Qeverie vetëm pak javë me parë ishin se Kosova nuk është prekur dhe na e mbulojmë shumicën e konsumit vendor, pra një neglizhim dhe amatorizëm total për arsye të mos dijes, por edhe kalkulimeve politike. Mospranimi i krizës ka qenë kalkulim politik i lidhur me zgjedhjet lokale”, ka deklaruar ai.

Ai ka thënë se askush nuk e di se sa do të zgjas kjo krizë. “Kosova sot gjendet në një krizë të thellë energjetike. Ashtu siç jemi të gjithë dëshmitarë, ditëve të fundit jemi përballë me reduktime të pakontrolluara të energjisë elektrike. Edhe me keq nuk kemi qartësi se deri kur do te zgjasë një situatë e tillë e edhe me pak cilat janë masat që po ndërmerren për të tejkaluar këtë situatë?”, ka deklaruar ai.