Bernard Nikaj, sekretar për Marrëdhënie Ndërkombëtare në PDK, ka thënë se për Kosovën, partneriteti me Shtetet e Bashkuara të Amerikës përfaqëson një bosht strategjik dhe ekonomik të pazëvendësueshëm, shumë më të rëndësishëm sesa pesha që ka tregu i Kosovës për ekonominë amerikane.

“Në këtë kontekst, mbajtja e tarifës prej 10% ndaj produkteve amerikane nuk ka domethënie ekonomike, e aq më pak arsyetim politik. Në këtë moment ajo dëmton drejtpërdrejt interesat afatgjata të shtetit të Kosovës dhe cenon lidhjet me aleatin tonë kryesor. Heqja e menjëhershme e kësaj tarife është jo vetëm një veprim racional, por edhe një sinjal i qartë politik se Kosova mbetet e përkushtuar ndaj thellimit të marrëdhënieve me SHBA-në”, ka shkruar ai në “Facebook”.

Nikaj ka thënë se çdo vonesë në këtë drejtim duhet të interpretohet si mungesë vizioni dhe joseriozitet nga ana e Qeverisë së Kosovës në raport me aleancat kyçe të vendit.