Nisma Socialdemokrate ka mbajtur mbledhjen e Kryesisë ku është diskutuar për administrimin e rezultatit zgjedhor të dalë nga zgjedhjet e 6 tetorit dhe në veçanti numërimin e votave të cilat kanë ardhur nga Serbia.

Në një komunikatë për medie, Nisma ka theksuar se në bazë të numërimit të votave të rregullta do të jetë pjesë e Kuvendit të Kosovës.

Në anën tjetër, kjo parti ka theksuar se me shqetësim ka përcjellë zhvillimet e djeshme ku në mënyre të papritur dhe duke mos respektuar procedurat ligjore, votat e parregullta të ardhura nga Serbia janë bartur në Qendrën e Numrit dhe Rezultateve (QNR) dhe janë numëruar.

“Nisma Socialdemokrate vlerëson se QNR ka shkelur ligjin kur i ka hapur dyert votave ilegale nga Serbia duke i pranuar ato pa vlerësimin ligjor se a janë apo nuk janë të rregullta dhe pa vendim të KQZ-së. Në raportin e 11 tetorit vet divizioni për shërbimin e votuesve jashtë vendit, në raportin që ia ka paraqitur KQZ-së, ka identifikuar një mal parregullsi për këto vota të ardhura nga Serbia. Duke filluar nga ajo që ato nuk kanë ardhur përmes postës dhe nuk janë postuar ashtu siç e parasheh ligji për votim me postë, por janë bartur në paketa dhe janë sjellë në postën numër 6 në Prishtinë, e deri tek ardhja e këtyre votave të grumbulluara në paketa, ku siç e thotë raporti paketa më e vogël i ka 157 zarfe, ndërsa paketa më e madhe i ka 238 zarfe”, është thënë në komunikatën e Nismës.

Më tutje, Nisma ka thënë se mbi 2 000 vota kanë ardhur në 19 paketa që sipas saj është në kundërshtim të plotë me Ligjin për zgjedhjet numër 03/L 073 neni 97, pika 1.

“Pastaj me shumë parregullsi siç janë zarfet identike që secila me nga një shenjë. Përveç këtyre parregullsive ligjore, kur i shtojmë asaj që për këto vota është hapur hetime për shkak të dyshimit për helmim, e që kemi parë pasoja të njerëzit. Janë dhjetëra zyrtarë që kanë kërkuar ndihme mjekësore dhe për këtë çështje është hapur hetim nga Prokuroria dhe përkundër krejt kësaj, pa pasur një raport përfundimtar nga Prokuroria për hetim, ato vota janë dërguar në numërim”, është thënë në këtë komunikatë.

Nisma ka shprehur dyshimet se dikush është i interesuar që përmes kontrabandimit të këtyre votave të paligjshme të prishë procesin zgjedhor, duke ndikuar drejtpërdrejt në rezultatin zgjedhor dhe të deformojë vullnetin e qytetarëve të Kosovës.

“NISMA i bën thirrje KQZ-së, të kryejë detyrën e saj kushtetuese si autoriteti kryesor në respektimin e ligjit dhe rregullores se saj në administrimin e drejtë të këtij procesi zgjedhor dhe të mos lejojë që përmes trafikimit të votave të parregullta të deformojë vullnetin e qytetarëve të Kosovës të shprehur në zgjedhjet e lira. Nisma po përcjellë në vazhdimësi çdo hap të këtij procesi dhe do të angazhohet që vullneti i mbi 40 mijë votuesve tanë të mos deformohet nga askush”, është thënë në komunikatën e Nismës Socialdemokrate, e cila drejtohet nga Fatmir Limaj.

/Epoka e re/