Ministri i Ekonomisë dhe Ambientit Muharrem Nitaj, me anë të një deklarate për medie, ka apeluar që të ndalet procesi i zgjedhjes së bordeve në Ndërmarrjet Publike.

Nitaj ka po ashtu ka thënë se nuk e ka proceduar as zgjedhjen e bordit të Telekomit.

“Shumicës së bordeve të ndërmarrjeve publike u ka kaluar mandati, por unë si Ministër i Ekonomisë dhe Ambientit, kam vendosur që të mos procedoj me rizgjedhjen e tyre, duke e konsideruar të arsyeshme që ky proces t’i mbetet qeverisë së re. Unë nuk kam proceduar me zgjedhjen e bordeve të reja, edhe në rastet kur kanë përfunduar të gjitha procedurat e rekrutimit, intervistimit dhe poentimit, siç është rasti me Bordin e Telekom-it”, u shpreh Nitaj.

Nitaj tutje bëri të ditur se u ka propozuar bordeve të përkoshme që të ndalin të gjitha procedurat për zgjedhjet të kryeshefave. “Po ashtu kam mbështetur sugjerimet partnerëve në procesin e rekrutimit, që në disa raste të ndërpritet edhe procesi i intervistimit të kandidatëve që tashmë kanë aplikuar në konkurset e rregullta për anëtarë të bordeve të ndërmarrjeve publike. U kam sugjeruar bordeve të përkohshme që të mos shpallin konkurse për zgjedhjen e kryeshefave ekzekutivë. Siç jeni në dijeni, Bordi i përkohshëm i Infrakos-it e ka zgjedhur kryeshefin ekzekutiv të Infrakos-it, edhe pse Zyra ligjore e Njësisë për Politika dhe Monitorimin e Ndërmarrjeve Publike ka konstatuar se ka munguar bashkëpunimi me aksionarin dhe ka pasur shkelje të kritereve të konkursit”, u shpreh tutje Nitaj.

Ai bëri të ditur se po ashtu ka kërkuar takim urgjent me Bordin e Infrakos-it. “Unë si Ministër u kam kërkuar që procesin ta rikthejnë në pikën zero, por pavarësisht kësaj ata kanë proceduar tutje, duke mos përfillur kërkesat e Ministrisë që është aksionar i kësaj ndërmarrjeje. Për më tepër ky Bord e ka zgjedhur kryeshefin ekzekutiv të Infrakos-it për një mandat 5 vjeçar, ndërkohë që me Ligjin për Ndërmarrjet Publike, në nenin 15.1 përcaktohet që secili drejtor zgjedhet në mandat prej 3 vitesh. Kam kërkuar takim urgjent me Bordin e Infrakos-it për të marrë shpjegimin e tyre, gjë që nuk është realizuar me arsyetimin se kryetari i Bordit nuk ndodhet në Kosovë”, ka deklaruar ai.

Nitaj ka thënë se ka kërkuar interpretim ligjor edhe me rastin e zgjedhjes së kryeshefit të Postës dhe se është në pritje të këtij interpretimi. “ Po ashtu kam kërkuar interpretim ligjor edhe në rastin e Postës, nëse ka pasur shkelje në procesin e zgjedhjes së kryeshefit Ekzekutiv dhe jam në pritje të tij. Si ministër, në përputhje me Ligjin për Ndërmarrjet Publike, interpretimin ligjor dhe kompetencat që kam, qysh sot do të propozoj të hyjë në rend dite të mbledhjes së radhës të Qeverisë, shkarkimi i Bordit të Infrakos-it”, u shpreh Nitaj.