Gjykata Themelore në Prishtinë ia ka caktuar masën e paraburgimit prej një muaji të dyshuarit Gent Myftari, i cili dyshohet se ka therur për vdekje vëllanë e tij, Auron Myftarit.

Në njoftim është thënë se gjykata ka vlerësuar se caktimi i masës së paraburgimit është adekuate dhe e domosdoshme, pasi sipas tyre, nëse i pandehuri lihet në liri, ekziston rreziku i ikjes së tij.

“Gjykata vlerësoj se caktimi i masës së paraburgimit është masë adekuate dhe e domosdoshme, sepse nëse i  pandehuri  lihet në liri, ekziston rreziku i ikjes së tij, i njëjti mund të shmanget nga procedura penale, duke pasur parasysh rrethanat dhe mënyrën se si është kryer vepra penale, si dhe mund të ndikojë në dëshmitarë, andaj gjykata vlerëson se lënia në liri e të pandehurit mund të rrezikojë në masë të madhe zhvillimin e drejtë të procedurës penale”, është thënë në njoftimin e gjykatës,.

Më 27 tetor të këtij viti, Gent Myftari, për motive ende të panjohura, dyshohet se e ka therur për vdekje vëllanë e tij, Auron Myftarin.