Një muaj paraburgim është caktuar për personin që ka sulmuar policët me kamion në Leposaviq. Sipas kërkesës së prokurorisë, i dyshuari A,D, të shtunën në fshatin Llazhinë të Komunës së Leposaviqit, ka rrezikuar jetën e katër zyrtarëve policorë, duke mos përfillur urdhërata e policisë për të ndaluar kamionin në një pikë kontrolli.

I dyshuari gjatë ikjes me kamion në të cilin kishte kryesisht pije të kontrabanduara nga Serbia, ka goditur dy herë automjetin e policisë, ku si pasojë e goditjeve zyrtarët policorë kanë marrë lëndime trupore.

Policët pasi kanë arritur ta ndalin kamionin në fjalë, i dyshuari ka provuar të ikë këmbë drejt malit, mirëpo pa sukses sepse është arrestuar nga policia.

Avokati i të dyshuarit, Nebojsha Vllajiq, ka bërë me dije për “Kosovapress” se deklaratat e politikanëve rreth këtij procesi nuk i kontribuojnë drejtësisë.

“Dhënia e deklaratave nga ana e politikanëve në Kosovë rreth këtij gjykimi se kush duhet të qëndrojë në paraburgim dhe kush jo, si dhe paragjykimi që në fillim, assesi nuk i kontribuon këtij procesi dhe bënë presion si në prokurori, ashtu edhe në gjykatë se si duhet të sillen në këtë proces’, ka thënë Vllajiqi.