Forcat Ajrore të SHBA-së do të prezantojnë në javën e parë të dhjetorit, avionin e ri bombardues të gjeneratës së ardhshme, B-21 Raider, duke hequr petkun e fshehtësisë që ka rrethuar projektin prej vitesh.

Prodhuesi Northrop Grumman dhe Forcat Ajrore do të ofrojnë një pamje ekskluzive të avionit në objektin e kompanisë në Palmdale të Kalifornisë.

Bombarduesi, i cili është i aftë të transportojë edhe armë bërthamore, do të kushtojë rreth 639 milionë dollarë dhe Pentagoni planifikon të blejë të paktën 100 prej tyre për të zëvendësuar avionët B-2 Spirit.

“B-21 është avioni ushtarak më i avancuar i ndërtuar ndonjëherë dhe është një produkt i inovacionit pionier dhe përsosmërisë teknologjike,” – tha zyrtari i Northrop Grumman, Doug Young.

Data e saktë e prezantimit ende nuk është caktuar dhe zyrtarët thonë se në ceremoni do të marrë pjesë vetëm një numër i përzgjedhur njerëzish.