Kompania Kosovare për Distribuim me Energji Elektrike – KEDS, ka bërë të ditur se një pjesë e konsumatorëve në Prishtinë janë pa energji elektrike si pasojë e një defekti në kabllon 20 kV në Daljen Rezonanca.

Sipas KEDS-it, ekipet kanë dalë menjëherë në vendin e ngjarjes dhe kanë lokalizuar defektin, megjithatë, sipas tyre, punimet për sanimin e prishjes janë penguar nga policia dhe inspektorati të cilat e kanë njoftuar ekipin e KEDS-it se punimet mund të vazhdojnë vetëm gjatë orëve të ditës, pas ankeses së një qytetari.

“Ekipi i KEDS-it ka dalë në vend menjëherë dhe ka gjetur prishjen. Megjithatë, mu afër atij vendi, pronari i një shtëpie aty afër i ka penguar punëtorët e kompanisë që të kryejnë punën e tyre. I njëjti person ka thirrur edhe Policinë e Kosovës, e më pas është thirrur edhe Inspektorati i Punës, të cilët i kanë detyruar punëtorët t’i ndërpresin punimet për shkak të zhurmës së makinerisë, pavarësisht se një numër i konsumatorëve aty ka mbetur pa furnizim me energji elektrike. Me këtë rast, ekipit të KEDS-it i është thënë që punimet mund t’i vazhdojnë vetëm gjatë ditës, diçka që deri më tani nuk ka ndodhur.”