Po shtohen radhët e futbollistëve shqiptarë në ligat e futbollit gjerman. Pas shumë futbollistëve shqiptarë që luajnë në Ligën e Parë dhe të Dytë gjermane, tani atyre u është shtuar edhe një talent i ri, një futbollist me perspektivë. Fjala është për Arbes Tahirsylajn, i lindur më 22. 5. 2003 (familja e tij emigroi nga Isniqi i Deçanit), i cili në shkollën e futbollit ia filloi si katërvjeçar dhe kaloi nëpër të gjitha kategoritë e futbollit derisa pas 12 vjetëve pune intensive iu ra në sy ekspertëve gjermanë të futbollit, të cilët nuk ngurruan të thonë se Arbesi vërtet është një talent i rrallë i futbollit. Prandaj, mes shumë klubeve që shfaqën interesim për Arbesin, vitin e kaluar ishte me i shpejti Klubi HSV e Hamburgut që, edhe pse në moshën 15-vjeçare, menjëherë i afroi angazhim për klubin në radhët e lojtarëve të U-16.

Klubin e Futbollit HSV të Hamburgut, që për momentin mban pozitën e dytë në Ligën e Dytë të futbollit gjerman, në sezonin e ardhshëm do të kthehet përsëri në Ligën e Parë (Bundesliga Gjermane). Edhe Arbesin në sezonin e ardhshëm do ta shohim në Ligën e Parë Gjermane. Aty ai mban pozicionin e qendërsulmuesit, mbase e karakterizon cilësia, shpejtësia të cilën e ka si dhe gjuajtjet e tij janë tejet të sakta.

Në këtë sezon, pas nënshkrimit të kontratës, Arbesi ka luajtur thuaja se në të gjitha ndeshjet, duke treguar formë dhe talent të mirë si lojtar i qendrës, por edhe si sulmues me një perspektivë të madhe, duke shënuar gola. Për këtë talent, sapo ka mbushur 16 vjet, janë interesuar disa ekipe gjermane të Ligës së Parë e të Dytë. “Është ëndërr imja, edhe dëshirë e prindërve të mi, që ta vesh fanellën e kombëtares shqiptare. Dua të luaj për Kosovën apo për Shqipërinë”, ka thënë Arbesi, i cili e ka kuptuar se vetëm me punë dhe stërvitje intensive do të arrijë një karrierë të suksesshme. Meqë talenti nuk i mungon, as angazhimi në një klub siç është HSV-ja, ai para vetes i ka të hapura shumë dyer të klubeve të mëdha të futbollit.

/Arif Molliqi/