Një zyrtar ukrainas ka bërë me dije se një varr masiv që përmban dhjetëra trupa civilësh është gjetur në fshatin Buzova pranë Kievit, pasi forcat ruse u tërhoqën nga zonat në veri të kryeqytetit.

Taras Didych, kreu i komunitetit Dmytrivka që përfshin Buzovën, ka thënë se trupat janë gjetur në një gropë pranë një stacioni karburanti.

Trupat ishin zbuluar gjithashtu në një duzinë makinash të granatuara në një rrugë kryesore që kalon përmes Buzovës, ka thënë ai.

“Tani po kthehemi në jetë, por gjatë okupimit kishim ‘pikat tona të nxehta’, shumë civilë vdiqën”, ka thënë Didych për televizionin ukrainas më 9 prill.

Kombet e Bashkuara kanë qenë në gjendje të konfirmojnë më shumë se 1 700 vdekje civile në Ukrainë. Por, numri aktual i të vdekurve besohet të jetë shumë më i lartë.

Gjatë javës së kaluar, imazhet nga Buça, qytezë në verilindje të Kievit shkaktuan reagim botëror.

Zyrtarët lokalë kanë thënë që më shumë se 300 njerëz janë vrarë nga forcat ruse vetëm në Buça dhe rreth 50 prej tyre janë ekzekutuar.

Moska ka hedhur poshtë këto pretendime.