Trajneri i Dritës, Ardian Nuhiu në konferencë për medie para ndeshjes me Dukagjinin e Klinës, ka thënë se humbja në ndeshjen e fundit në derbin ndaj Gjilanit nuk do të ketë aspak ndikim dhe se futbollistët e Dritës janë gati për t’iu rikthyer fitoreve.

Nuhiu lidhur me kundërshtarin e radhës është shprehur se ka një skuadër të mirë dhe se pozita aktuale e tyre nuk është reale, pasi ata kanë merituar të kenë me shumë pikë.

“Kemi një transfertë të fortë realisht, njohim mirë kundërshtarin e radhës dhe ka një skuadër të mirë brenda grupit. Neve nuk do të na gënjejë klasifikimi, sepse kemi analizuar ndeshjet e tyre dhe mendoj se ata kanë merituar më shumë pikë sesa kanë për momentin, sigurisht mund të jetë faktori fat në këtë aspekt. Kam punuar shumë me futbollistët këto ditë, sikurse në atë taktik dhe psikologjik, për shkak se po vijmë nga një humbje. Mendoj se skuadra është gati për të reaguar dhe për të treguar karakter. Në momentin që ndeshjen e humbin në atë mënyrë (ndaj Gjilanit) nuk bezdisëm shumë pasi krijuam, u munduam dhe patëm angazhim. Mund ta quaj edhe një humbje aksidentale. Djemtë pritet që të tregojnë karakter të enjten dhe nuk besoj se do të ndikojë kjo”, ka thënë Nuhiu.

“Që nga fillimi kam thënë disa herë këtu që kemi pasur dëmtime, na kanë munguar 2-3 lojtarë ose diçka e ngjashme. Ata po punojnë që të rikthehen tek goli, nuk është e lehtë por dalëngadalë unë e shoh që po kthehen. Derisa të jem unë trajner në këtë skuadër, gjithmonë për sukses do të jenë futbollistët, në rast humbje gjithmonë do të marrë përgjegjësit e mia. Kam tre vite këtu dhe ndoshta ka qenë stadiumi plotë me tifozë dhe nuk ka ndodhur në asnjë moment një diçka e keqe. Gjëja e bukur e këtij derbi është që mund të ndodhë njëri vëlla të jetë me Dritën dhe tjetri me Gjilanin. Nuk mendoj se pati lëshim të organizimit, edhe në Evropë klube më të mëdha kanë aksidente të tilla, nuk dua të marrë jehonë të tillë ky derbi. Nëse futbollin kosovar e bën diçka të bukur është ky derbi ose edhe tifozëritë e tilla”, ka deklaruar Nuhiu.