Federata e Basketbollit e Kosovës (FBK) ka njoftuar se pavarësisht prej insistimit të madh nga ana e saj te Ministria e Shëndetësisë (MSh) në “Final 8” të Kupës së Kosovës në basketboll, që do të zhvillohet nga 3 deri më 7 shkurt në Suharekë, nuk do të lejohen shikuesit dhe do të respektohet vendimi i Qeverisë së Kosovës që në palestër duhet të jenë maksimumi 50 persona, duke përfshirë këtu lojtarët, trajnerët, gjyqtarët, zyrtarët e ndeshjes dhe zyrtarët e FBK-së.

Federata e Basketbollit e Kosovës ka kërkuar dhe ka insistuar te Ministria e Shëndetësisë disa herë që të lejohen të paktën 200 shikues, të cilët do t’o respektonin masat, si distancën fizike dhe bartjen e maskës, megjithatë vendimi nga MSh-ja nuk ka ndryshuar. “Federata e Basketbollit e Kosovës (FBK) edhe një herë kërkon nga Ministria e Shëndetësisë (MSh) dhe Instituti Kombëtar i Shëndetësisë Publike i Kosovës (IKShPK) lejimin e shikuesve (200 në total) në ndeshjet e Final 8 Kupës së Kosovës, ngjarje kjo që do të organizohet prej 3 deri më 7 shkurt 2021 në palestrën e sportit “13 Qershori” në Suharekë. Federata e Basketbollit e Kosovës rithekson se është e gatshme që së bashku me organizatorin e Final 8 Kupës së Kosovës, Klubin e Basketbollit Golden Eagle Ylli, ta bëjë organizimin e shikuesve, gjithnjë duke respektuar masat në fuqi për Covid-19 të Qeverisë së Republikës së Kosovës, Udhëzuesin e FBK-së për Rikthimin në Fushat e Basketbollit dhe Protokollin e FIBA-s për Covid-19, në të cilat theksohet fuqishëm mbajtja e distancës sociale dhe e vendosjes së maskës”, thuhet në kërkesën e FBK-së.

Të dielën Ministria e Shëndetësisë ka treguar se do të lejohen vetëm 50 persona gjatë aktiviteteve në palestra.

“Referuar e-mailit tuaj, ju informojmë që aktivitetet mund të realizohen gjithmonë duke respektuar vendimet e lëshuara nga Qeveria e Republikës së Kosovës, si dhe manualin për mbrojtje nga Covid-19”, thuhet në përgjigjen nga MSh, që i referohet vendimit të mëparshëm me numër 09/58 të datës 14.01.2021, gjegjësisht pikës 24 të vendimit – Masat për aktivitete publike. Federata e Basketbollit e Kosovës sërish ka kërkuar që të lejohen tifozët, por përgjigjja e prerë ka arritur sërish të martën (sot). “Nga QOE/MSH më parë keni pranuar përgjigjen në kërkesën tuaj. Ju rikujtojmë që nuk ka ndryshime nga Vendimin nr. 09/58 datë 14.01.2021, që nënkupton se shprehimisht është e rregulluar lejimi i këtyre aktiviteteve dhe pjesëmarrja e mundshme e personave në këto aktivitete”. Vendimi për lejimin e aktiviteteve sportive në palestra është ky: “Në hapësira të mbyllura ndalohet grumbullimi i qytetarëve në numër prej më shumë se 30 personave, ndërsa në sheshe publike, parqe, vende publike, qendra rekreative dimërore dhe të ngjashme, lejohet grumbullimi deri në 50 persona me përjashtim të rasteve të lejuara me këtë vendim”.

Federata e Basketbollit e Kosovës, në bashkëpunim me klubin organizator Golden Eagle Ylli, do të bëjë çmos që këto rregulla të respektohen dhe të mos ketë probleme. Rrjedhimisht edhe mediat nuk do të lejohen në palestër, megjithatë Federata e Basketbollit e Kosovës do të përkujdeset që të ofrojë statistikat ‘LIVE’ në faqen zyrtare, raportet e ndeshjeve, fotografitë, “Highlights” dhe deklaratat pas ndeshjes.