Kryeministri i Kosovës, Albin Kurti, në një intervistë për mediumin ‘The Observer’, gazetë kjo simotër me prestigjiozen ‘The Guardian’, ka kritikuar “pa hatërmbetje” Bashkimin Europian karshi qasjes ndaj gjashtë shteteve të Ballkanit Perëndimor.

“Më pëlqen BE-ja për vlerat që ka, por kam një kritikë ndaj saj, kritikë pa hidhërim, sepse dua që BE-ja të përmirësohet dhe të mos shpërbëhet”, deklaroi ai.

“Arsyeja pse nuk mund të jem i hidhëruar nga BE-ja është për shkak të mungesës së besimit që BE-ja ka te gjashtë vendet e Ballkanit Perëndimor. Është një shprehje e mungesës së vetëbesimit në vetvete. Nuk është se ata na urrejnë, por nuk i besojnë sa duhet vetes”, deklaroi tutje i pari i ekzekutivit për mediumin britanik.

Ai e ka parë mendësinë e Serbisë si problematike në zgjidhjet e problemit përbrenda Ballkanit. Sipas Kurtit, Serbia provon t’i kontrollojë ose zhbëjë shtetet fqinje.

“Në ditët e sotme, pak a shumë, Serbia nuk i njeh fqinjët e saj që nuk janë pjesë e BE’së. Qëndrimi i Beogradit është se Bosnje dhe Hercegovina, Mali i Zi, Kosova dhe Maqedonia e Veriut janë shtete të përkohshme që Serbia duhet t’i kontrollojë ose t’i zhbëjë”, ka deklaruar ai.

“Të gjitha zgjidhjet varen më pak nga imagjinata dhe krijimtaria dhe më shumë nga gatishmëria për të ndryshuar këtë mendim, këtë bindje të Serbisë, se shtetet fqinje nuk janë shtete të vërteta”, ka theksuar më tej kryeministri.