NATO nuk ka në plan ta përdorë mbrojtjen e saj ajrore për të siguruar mbulim për Ukrainën, ka insistuar sekretari i përgjithshëm i organizatës, Jens Stoltenberg. Komenti i tij erdhi disa ditë pasi presidenti ukrainas Zelensky i kërkoi SHBA-së dhe aleatëve të saj të rrëzojnë raketat ruse.

Duke folur për New York Times të hënën, Zelensky deklaroi se ai nuk sheh asnjë problem me një përfshirje të tillë të NATO-s, duke argumentuar se kjo nuk do të ishte e barabartë me një “sulm ndaj Rusisë”.

Zelensky vuri në dukje se SHBA-ja dhe Britania e Madhe kishin rrëzuar raketat dhe dronët iranianë në hyrje mbi Izrael muajin e kaluar. Si Uashingtoni ashtu edhe Londra, megjithatë, kanë argumentuar se të dy skenarët nuk janë të krahasueshëm.

Në një intervistë me Welt am Sonntag, Stoltenberg tha: “Ndërsa ne po rrisim mbështetjen tonë për vetëmbrojtje të Ukrainës, nuk ka plane për të dërguar trupa të NATO-s në Ukrainë ose për të shtrirë mburojën e mbrojtjes ajrore të NATO-s në Ukrainë”.

“NATO nuk do të bëhet pjesë e konfliktit”, këmbënguli shefi i NATO-s.

Ai sugjeroi gjithashtu se Kievi mund të rimarrë ende avantazhin në konflikt, pavarësisht se Rusia aktualisht duket se e ka atë momentalisht. Për të siguruar këtë, arsyetoi ai, vendet anëtare të NATO-s duhet të “dërgojnë më shumë armë dhe municione në Ukrainë, e cila përfshin sisteme të mbrojtjes ajrore dhe armë me rreze të gjatë”.