Ka shënuar rritje për 25 për qind numri i operacioneve të kryera nga kirurgët e Klinikës së Kirurgjisë Abdominale në QKUK.

Sipas raportit të punës së kësaj klinike, në nëntë muajt e parë të vitit 2023, janë kryer 1 mijë e 691 operacione, përfshirë operacione urgjente, por edhe ato të planifikuara, në programin e rregullt operativ.

Duke iu referuar të njëjtit raport, janë kryer edhe 303 intervenime endoskopike (ERCP), 147 Gastrokopi, 148 Kolonoskopi dhe shërbime të tjera të natyrës kirurgjike.

Në kuadër të intervenimeve kirurgjike elektive ka dominuar Holecistektomia laparoskopike (heqja kirurgjikale e fshikëzës së tëmthit), kurse te sëmundjet urgjente ka dominuar trajtimi kirurgjik i apendicitit akut (zorra qorre), në kuadër të abdomenit akut si sindromë klinike.

Numri i intervenimeve kirurgjike të realizuara në nëntë muajt e parë të këtij viti është i barabartë, pothuajse me intervenimet kirurgjike të realizuara gjatë krejt vitit të kaluar.