Bashkimi Eropian ka ngritur shkallën e vlerësimit të rrezikut të saj për shpërthimin e coronavirusit (COVID-19), duke paralajmëruar se tani ekziston një rrezik i moderuar deri i lartë i transmetimit të qëndrueshëm në vendet anëtare të BE-së dhe Mbretërisë së Bashkuar në javët e ardhshme.

Sipas mediave të huaja, paralajmërimi vjen mes një rritje të rasteve në Evropë dhe në të gjithë botën.

Në një konferencë për shtyp të Komisionit të BE-së, Komisioneri për Shëndetësi Stella Kyriakidou njoftoi se Qendra Evropiane për Kontrollin dhe Parandalimin e Sëmundjeve (ECDC) kishte ngritur nivelin e rrezikut, pasi blloku përpiqet të bashkërendojë përpjekjet për të ndaluar përhapjen e coronavirusit.

Siç bëhet e ditur më tej, BE tani ka më shumë se 2.100 raste të konfirmuara në 18 shtete anëtare, me 39 njerëz që humbën jetën deri më tani.

Këto shifra përfshijnë gjithashtu raste në Mbretërinë e Bashkuar, Monako, San Marino dhe Zvicër.

Gjithashtu, zyrtarët nga Organizata Botërore e Shëndetit këmbëngulën që vendet duhet të përqendroheshin në një strategji agresive të përmbajtjes, në mënyrë që të ndalonin përhapjen.