Të premten (më 4 nëntor) do të mbahet konferenca e 15-të mbi ecurinë në çështjen ndaj Hashim Thaçi, Kadri Veseli, Jakup Krasniqi dhe Rexhep Selimi në Hagë.

Në bazë të vendimit të gjyqtarit paraprak mbi caktimin e kësaj konference është bërë me dije se në këtë konferencë do të diskutohet për nxjerrjen e provave, përkthimet, hetimet e mbrojtjes dhe hapat e mëtutjeshëm dhe çështje të tjera.

Sa i përket nxjerrjes së provave do të kërkohet të dihet nëse është bërë progres në procesin e zbulimit në lidhje me materialin e rregullës 107, në veçanti, sa nga ky material mbetet për t’u pastruar dhe nëse ndonjë aplikim shtesë në përputhje me këtë rregull është i pashmangshëm, raporton “Betimi për Drejtësi”.

Lidhur me përkthimet, gjykatësi paraprak ka kërkuar të informohet nëse administrata mund të sigurojë një përditësim për përkthimet e pazgjidhura, në veçanti përparimin e përkthimit të aktakuzës së ndryshuar më tej dhe grafikut të rregullës 109 (c) dhe plotësimit të tij.

Ndërsa sa i përket hetimeve të mbrojtjes dhe hapave të mëtejshëm, do të kërkohet të dihet nëse mbrojtja mund të japë më shumë informacion mbi statusin e hetimeve të tyre, veçanërisht çfarë hapash kanë ndërmarrë për të çuar përpara hetimet e tyre.

“Nëse ka pasur ndonjë përparim në lidhje me diskutimet mbi pikat e marrëveshjes mbi ligjin dhe/ose faktet, në përputhje me rregullat 95 (3) dhe 156 të rregullave, dhe nëse palët parashikojnë ndonjë vështirësi në paraqitjen e njoftimeve deri më 18 nëntor 2022 dhe nëse mbrojtja parashikon ndonjë vështirësi në paraqitjen e njoftimeve në lidhje me kundërshtimet e tyre, nëse ka në këtë fazë të procedurës, për pranueshmërinë e materialit provues të zbuluar, në përputhje me rregullën 95 (2) (e) të rregullave, deri më 18 nëntor 2022”, është thënë në vendimin e gjyqtarit të Gjykatës Speciale.

Më tutje është thënë se do të kërkohet të dihet nëse Zyra e Prokurorit të Specializuar parashikon ndonjë vështirësi në sigurimin e listës së 40 dëshmitarëve të parë që synon të thërrasë në gjyq deri më 18 nëntor 2022.

“Lidhur me rregullat 153, 154 dhe 155 të rregullores, vihet re se ka dëshmitarë që kanë dhënë disa deklarata dëshmitarësh, a do të ishte ZPS në gjendje të tregojë (nëpërmjet ERN-së së dokumentit) se cilën deklaratë (at) synon të ofrojë për pranim sipas këtyre rregullave dhe nëse palët parashikojnë ndonjë vështirësi në transferimin e kësaj çështjeje në një trup gjykues rreth fundit të vitit dhe nëse palët parashikojnë ndonjë vështirësi për t’u paraqitur para një trupi gjykues menjëherë pas dorëzimit të çështjes”, është thënë në këtë vendim. Në fund të vendimit është thënë se palët dhe pjesëmarrësit ftohen të tregojnë nëse parashikojnë nevojën për një konferencë në dhjetor përpara transferimit të çështjes në një trup gjykues.

Zyra e Prokurorit të Specializuar më 30 shtator ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika. Ata janë duke u akuzuar kinse për krime lufte, por nga fillimi janë deklaruar të pafajshëm në raport me të gjitha akuzat që rendojnë mbi ta.

Thaçi, Veseli, Krasniqi dhe Selimi janë duke u mbajtur në paraburgim që nga nëntori  i vitit 2022, pavarësisht se disa herë kanë kërkuar që të mbrohen në liri.  Përpos tyre në Hagë janë duke u mbajtur në paraburgim edhe Sali Mustafa, Hysni Gucati, Nasim Haradinaj dhe Pjetër Shala.