Mospërkrahja e mjaftueshme e Qeverisë është duke sjell në kolaps biznesin i cili edhe përkundër vullnetit që t’i mbajë në punë punëtorët, detyrohet t’i largojë puna. Për këtë arsye është shumë e nevojshme që Qeveria dhe Parlamenti të ndryshojnë qasjen ndaj biznesit me ndryshimin e ligjeve dhe rritjen e përkrahjes ndaj bizneseve, u tha gjatë takimit që Skender Krasniqi nga OAK pati me kryetarin e Sindikatës së Pavarur të Sektorit të Punëtorëve Privat, Jusuf Azemi.

Temë kryesore e diskutimit përgjatë këtij takimi ishte gjetja e një mundësie për mos largimin e punëtorëve nga vendi i punës, pasi që kjo bartë në vete një risk të madh.

Në këtë takim u tha se pandemia COVID -19, ka atakuar më së tepërmi sektorin privat, pra vetë bizneset.

“Krasniqi dhe Jusufi, kanë bërë thirrje publike për të marrë përkrahje nga Qeveria e Kosovës, përkrahje kjo për të cilën me të vërtetë sektori privat ka shumë nevojë. Në të kundërtën, shumë biznese do të shkojnë drejt falimentimit dhe mijëra qytetarë do të mbesin pa vende pune. Nëse situata vazhdon të jetë e njëjtë, pa ndonjë progres në ditët në vazhdim, rreth 100 mijë punëtorë rrezikohet të mbesin të pa punë”, u  tha në takim.

Për këtë kërkohet subvencione nga ana e shtetit, në të kundërtën do të rrezikohet mirëqenia e qytetarëve tanë dhe të hyrat e shtetit, u tha në takim.

Në mes të tjerash, OAK vazhdon të ngrisë si çështje jashtëzakonisht të rëndësishme, që secili punëtor duhet të jetë i pajisur me sigurimin shëndetësor dhe sigurimin në punë.

Ndërsa, kryetari i SPSPK-së bëri me dije se gjatë javës së ardhme do të mbajnë protesta para Qeverisë së Republikës së Kosovës, për shkak të mungesës së përkrahjes nga ana e shtetit për punëtorët e Sektorit Privat, konkretisht, për pagesat shtesë të punëtorëve teknik-shëndetësor.