Kreu i Organizatës Botërore të Shëndetësisë ka dalë me një thirrje të drejtpërdrejtë për liderët e botës që të mos humbasin besimin dhe të mos dorëzohen në luftën përballë përhapjes së pandemisë së koronavirusit.

Tedros Adhanom Ghebreyesus deklaroi se e kupton lodhjen mendore dhe fizike me të cilën po përballen njerëzit në të gjithë botën, por ky nuk është momenti për t’u dorëzuar.

“Liderët duhet të balancojnë ndërprerjen e mënyrës së jetesës me nevojën për t’i mbrojtur punonjësit e shëndetësisë dhe sistemin shëndetësor që të mos shembet”, u shpreh Ghebreyesus.

Komentet e kreut të OBSh-së vijnë disa ditë pas deklaratave të një ndihmësi të presidentit të Shteteve të Bashkuara, Donald Trump, i cili pranonte se ShBA-ja nuk do ta kontrollonte pandeminë.