Christian Eriksen do ta ketë thuajse të pamundur rikthimin e tij në Itali, aty ku me defibrilatorin në zemër nuk lejohet të luajë. Interi pritet të heqë dorë nga shërbimet e mesfushorit dhe ta lërë atë të lirë për të zgjedhur aventurën e ardhshme në një vend që e lejon rikthimin në fushë.

Aktualisht danezi ka filluar stërvitjen në vendlindje te klubi i Odenses, ndërsa drejtori sportiv i këtij klubi i ka bërë ftesë 28-vjeçarit t’u bashkohet përfundimisht.

“Nëse do të kthehet të luajë futboll me ne, e mirëpresim dhe jemi gati t’i ofrojmë një kontratë. Edhe nëse nuk do të jetë në fushë, mund t’i ofrojmë një rol jashtë saj, por normalisht që në Danimarkë asnjë nga klubet nuk mund të paguajë shifra të larta. Gjithsesi, është vendimi i tij dhe e respektojmë 100%”, u shpreh Augustinos.