Oda Ekonomike e Kosovës (OEK) ka bërë me dije se me vëmendje ka përcjell zhvillimet dhe debatin publik rreth projektit për ndërtim të hapësirave banuese, në zonën që rrethon liqenin e Badocit.

“Duke vlerësuar lartë prioritetin e ruajtjes së ambientit, por edhe të përkrahjes të investimeve nga kompanitë vendore dhe ndërkombëtare, ne bëjmë thirrje për të gjitha palët që të zbatojnë ligjin dhe standardet më të larta ndërkombëtare për ruajtjen e resurseve natyrore, duke respektuar të drejtat e investitorëve, jo vetëm në këtë projekt por edhe në projekte tjera”, është theksuar në komunikatën e OEK-ut.

Më tej thuhet se në rastet kur përgjegjësia institucionale për zbatim të ligjit është te institucionet kompetente, duhet të kursehemi nga fushatat kundër kompanive vendore dhe ndërkombëtare të angazhuara në zbatimin e këtij projekti dhe projekteve tjera, sidomos kur kemi një situatë të paqartë ligjore, që nuk është pasojë e veprimeve të kompanive, por është pasojë e (mos) veprimit institucional.

/Epoka e re/