Të premten, Besnik Berisha u zgjodh kryetar i ri Komisionit të Pavarur për Media (KPM) për një mandat dyvjeçar, me katër nga pesë vota të anëtarëve të bordit.

Procesi i votimit, i cili ndodhi disa ditë para përfundimit të mandatit të kryetarit aktual, Jeton Mehmeti, më 21 janar, ka ngjallur reagime të ashpra nga partitë opozitare.

Nënkryetarja e PDK-së, Vlora Çitaku, e cilësoi këtë zhvillim si “kapje politike” nga qeveria e udhëhequr nga Lëvizja Vetëvendosje (LVV).

Ajo paralajmëroi për rrezikun që ky veprim mund të sjellë për lirinë e medias dhe kërkoi ndërhyrjen e gjyqësorit nëse janë shkelur ligjet dhe rregulloret.

Deputetja e LDK-së, Rrezarta Krasniqi, deklaroi se kjo qasje përbën “rrezik për funksionimin e mediave dhe demokracinë” dhe premtoi se pas 9 shkurtit pavarësia e institucioneve do të mbrohet.

Nga ana tjetër, Aleanca për Ardhmërinë e Kosovës (AAK) e quajti zgjedhjen e kryetarit të ri një “tentativë autokrate” për të kontrolluar institucionet e pavarura të mediave, sidomos në prag të fushatës elektorale.

Komisioni i Pavarur për Media, themeluar në vitin 2005, është institucioni që mbikëqyr spektrin e frekuencave të transmetimit në Kosovë.

Ky organ licencon transmetuesit publikë dhe privatë, përcakton politikat e transmetimit dhe rregullon të drejtat dhe detyrimet e ofruesve të shërbimeve mediale audio dhe audiovizuale.

Anëtarët e KPM-së emërohen nga Kuvendi i Kosovës, ndërsa kryetari dhe nënkryetari zgjidhen përmes votave të fshehta të anëtarëve të bordit.

Opozita ka shprehur shqetësime serioze se kjo zgjedhje mund të cenojë pavarësinë e KPM-së dhe lirinë e medias në Kosovë.

Si rezultat, partitë opozitare kanë paralajmëruar përdorimin e të gjitha mekanizmave ligjorë për të kundërshtuar këtë vendim dhe për të mbrojtur integritetin e këtij institucioni.