Ndryshimi i klimës dhe ndotja po “largojnë” oksigjenin nga oqeanet tona dhe kërcënojnë shumë lloje peshqish. Ky është përfundimi i studimit më të madh në llojin e tij, të ndërmarrë nga grupi ambientalist IUCN.

Ndërsa ndotja është e njohur tashmë prej dekadash, ekspertët thonë se ndryshimi i klimës po e përkeqëson mungesën e oksigjenit. Rreth 700 zona oqeanike kanë tani probleme me uljen e nivelit të oksigjenit në ujë, krahasuar me atë të regjistruar në vitet 1960. Studiuesit thonë se ky fenomen kërcënon specie të ndryshme që përfshijnë tonin dhe peshkaqenët. Kërcënimi për oqeanet nga rrjedhja në to e kimikateve të tilla si azoti dhe fosfori, që vijnë nga fermat dhe industria, përbën prej kohësh shqetësim sepse është provuar që ndikon tek niveli i oksigjenit në ujin e detit.

Ajo vazhdon të mbetet një faktor në përkeqësimin e situatës, sidomos në zonat bregdetare. Megjithatë, vitet e fundit është rritur edhe kërcënimi nga ndryshimi i klimës. Me efektin serë, oqeanet thithin më shumë nxehtësi dhe uji I ngrohur, nga ana tjetër, mund të mbajë më pak oksigjen. Shkencëtarët vlerësojnë se midis viteve 1960 dhe 2010, sasia e gazit të tretur në oqeane ka rënë me 2%.