Në një letër drejtuar presidentit amerikan, Donald Trump, Organizata “Shqiptarët e Bashkuar, – Michigan në krye me Rrok Dedvukaj ka shprehur thellë shqetësimin e tyre lidhur me ambasadorin amerikan në Gjermani, Richard Grenell si dhe raportet mes Kosovës dhe Serbisë përfshirë këtu edhe tentativën për të arritur një ‘marrëveshje’ paqeje mes dy vendeve.

Në këtë letër mes tjerave shprehet shqetësimi për realizimin e ndonjë marrëveshje që do të ishte në dëm të shqiptarëve të Kosovës duke mos përfillur kryeministrin aktual Albin Kurti, që sipas kësaj organizate është njeriu i vetëm i cili do të largonte krimin dhe korrupsionin nga të gjitha nivelet e qeverisjes.

Që nga pavarësia e Kosovës në vitin 2008, shteti serb ka vendosur disa taksa dhe ka shkelur shumë marrëveshje tregtare të cilat kanë qenë në dëm të shtetit të Kosovës, thuhet në këtë letër.

Në letër shprehet gjithashtu edhe tentative e kryeministrit Kurti që me përkrahje të të gjitha partive në Kosovë të largojë gradualisht tarifën 100% ndaj produkteve serbe dhe boshnjake.

Më tej në letrën shqetësuese drejtuar Trumpit, shfaqet gjithashtu shqetësimi ndaj pretendimeve të presidentit serb Vuçiq dhe ambasadorit Grenell për ndonjë marrëveshje që do të ishte shumë e dëmshme për Republikën e Kosovës derisa kjo e fundit ka qenë gjithmonë në krah të Shteteve të Bashkuara të Amerikës dhe ka kundërshtuar fuqishëm Rusinë.

Mes tjerave organizata e shqiptarëve të bashkuar në Miçigan kërkon nga presidenti Trump të largojë nga detyra e ndërmjetësimit në bisedimet mes Kosovës dhe Serbisë.