![](https://www.epokaere.com/wp-content/uploads/2023/07/v-600x360-1.webp)
Osmani i pret në zyrë kryeministrin e Holandës e të Luksemburgut
Presidentja e Republikës së Kosovës, Vjosa Osmani i ka pritur në takim kryeministrin e Holandës, Mark Rutte, dhe homologun e tij nga Luksemburgu, Xavier Bettel.
Fillimisht ata në Aeroportin e Prishtinës janë pritur nga kreu i Qeverisë, Albin Kurti me të cilin do të takohen edhe më vonë në ndërtesën e Qeverisë ku edhe do të mbajnë konferencë për medie.
Vizita e liderëve të Holandës dhe Luksemburgut vjen në kohën kur tensionet mes Kosovës dhe Serbisë janë rritur.
Tensionet nisën në fund të majit, kur kryetarët e rinj shqiptarë të Zveçanit, Leposaviqit dhe Zubin Potokut nën asistimin e policisë hynë në ndërtesat komunale, pavarësisht kundërshtimit të serbëve lokalë.
Bashkësia ndërkombëtare ka kërkuar nga Kosova dhe Serbia që të ulin tensionet dhe të organizohen zgjedhje të reja në katër komunat në veri./EO