Presidentja e Republikës së Kosovës, Vjosa Osmani, ka pritur në takim ambasadoren e Francës në Prishtinë, Marie-Christine Butel, si dhe një delegacion të Agjencisë Franceze të Zhvillimit (ADF) të përbërë nga Dominique Hautbergue, udhëheqës i zyrës rajonale për Ballkanin Perëndimor, Mirela Mata, zyrtare për strategji dhe operacione për Shqipërinë dhe Kosovën, si dhe Florence Dobelle, udhëheqëse e shërbimit ekonomik rajonal për zonën Danub-Ballkan.

Në takim është diskutuar për aktivitetin e Agjencisë franceze të zhvillimit në rajon dhe në veçanti në Republikën e Kosovës, me ç‘rast presidentja Osmani ka bërë thirrje për rritjen e aktivitetit dhe përkrahjes së ADF-së në vendin tonë.

Presidentja Osmani ka thënë se gjatë mandatit të saj, mbrojtja e mjedisit, fuqizimi i grave, dhe mbrojtja e të drejtave të grupeve të margjinalizuara, në veçanti të fëmijëve, përbëjnë disa nga top prioritetet në angazhimin e saj në fushën e agjendës zhvillimore.

Ndërsa përfaqësuesit e ADF-së kanë theksuar se fokusi i punës së tyre është në fusha si tranzicioni i gjelbër në përputhje me objektivat e Marrëveshjes së Parisit, fuqizimi i grave, si dhe zhvillimi i partneriteteve.

Në këtë drejtim, presidentja Osmani ka ofruar mbështetjen, duke shprehur gatishmëri për bashkëpunim të vazhdueshëm.

“Jemi të vetëdijshëm që vendimet që i marrim sot do të kenë ndikim edhe në jetët e gjeneratave që vijnë pas nesh, prandaj do të angazhohemi që të përpilojmë politika të mençura, gjithëpërfshirëse, dhe të cilat garantojnë mbrojtjen e mjedisit e rrjedhimisht dhe të shëndetit tonë. Në këto përpjekje, shpresojmë dhe besojmë se do të kemi mbështetjen e aleatëve tanë dhe të institucioneve siç është edhe ADF-ja”, ka theksuar Osmani.