Ministri për Punë të Jashtme i Republikës së Maqedonisë së Veriut, Bujar Osmani, ka folur në lidhje me gabimin e Komisionit Evropian (KE), i cili ka kërkuar që Maqedonia e Veriut të vendosë regjim vizash për Kosovën.

Osmani ka thënë se ky gabim i KE-së është përmirësuar, ndërsa ka thënë se Maqedonia asnjëherë nuk do t’i vendosë viza Kosovës.

Gjithashtu, Osmani ka theksuar se po tentohet që të zbatohet “one stop shop” nëpër pikat kufitare me Kosovën, që mos të krijohen kolona të gjata dhe qytetarët të qarkullojnë lirshëm, shkruan “Alsat M”.

“Është gabim i Komisionit Evropian. Vendosja e Kosovës në listën e vendeve me të cilat duhet të kemi regjim vizash është lëshim i cili është rishikuar nga ana e Komisionit Evropian, asnjëherë nuk ka kaluar nëpër institucionet e KE-së sepse do të rishikohet sepse është kontradiktore me politikat e BE-së. Ne në kuadër të Procesit të Berlinit vetëm se nënshkruam marrëveshje për qarkullim mes 6 vendeve anëtare vetëm me letërnjoftim në rajon, kështu që trendi është i kundërti me vendosjen e vizave”, ka thënë Osmani.