Kryetarja e Kuvendit të Kosovës, Vjosa Osmani, gjatë konferencës online të punimeve të Asamblesë Parlamentare të Procesit të Bashkëpunimit të Evropës Juglindore (SEECP), ka thënë se qëllimi i Kosovës është integrimi në Bashkim Evropian (BE).

“Kjo konferencë shumë specifike sot do të trajtojë tri çështje të ndryshme dhe të gjitha ato kanë një ndikim të jashtëzakonshëm në jetën e përditshme të qytetarëve tanë në rajon. Integrimi në BE është ndër qëllimet kryesore të politikës së jashtme të shumicës, nëse jo të të gjitha vendeve të rajonit”.

“Qasja e re për t’u bërë anëtarë në BE ka ngritur dyshime tek disa që po pretendojnë se procesi është bërë më i komplikuar. Sidoqoftë, kjo nuk ka qenë me të vërtetë tendenca primare e Komisionit dhe shteteve anëtare”, ka thënë Osmani, raporton “Epoka e re”.

Më tutje, ajo ka folur edhe për mjedisin dhe problemin me ndotje, duke thënë se këto dy çështje paraqesin kërcënim për shoqërinë.

“Ndryshimi i klimës dhe degradimi i mjedisit janë një kërcënim ekzistencial për të gjithë ne, përfshirë rajonin tonë. Për të kapërcyer këto sfida, Evropa ka planifikuar një strategji të rritjes që shndërron Bashkimin në një ekonomi moderne, me efiçencë të burimeve dhe konkurrencës. Meqenëse Marrëveshja e Gjelbër Evropiane siguron një udhërrëfyes me veprime për të rritur përdorimin efikas të burimeve duke lëvizur në një ekonomi të pastër, riprodhuese dhe për të rikthyer biodiversitetin dhe për të ulur ndotjen, kjo është një mundësi e shkëlqyeshme për ne që të diskutojmë mbi modalitetet se si të shfrytëzojmë maksimalisht përfitimin për rajonin tonë gjithashtu”, është shprehur Osmani, duke shtuar se sfidë për Kosovën mbetet edhe sigurimi i kushteve për të rinjtë, të cilët regjistrohen dhe mbarojnë studimet e tyre në universitetet më të mira në të gjithë botën dhe kthehen në vendlindje.

Ajo ka thënë se dëshiron të marrë këshilla për këtë çështje që të përfitohet nga formimi intelektualë i tyre.

“Jam e lumtur që do të dëgjojmë panelistët të diskutojnë mbi këtë çështje shumë të rëndësishme dhe mezi pres të marr disa këshilla dhe ide të shkëlqyera në lidhje me këtë çështje”, ka thënë Osmani.

Në fund, Osmani ka rikonfirmuar angazhimin e Kosovës në forcimin e bashkëpunimit rajonal për t’u bërë një partner të besueshëm në rajon që garanton stabilitetin, paqen dhe marrëdhëniet e fqinjësisë së mirë.

“Në fakt, Kosova tashmë e ka provuar këtë në faza të ndryshme të historisë. Unë do ta konfirmoj këtë përkushtim në seancën plenare të së mërkurës me kryetarët e parlamenteve nga anëtarët e SEECP dhe partnerët e tjerë”.

“Shpresoj që shtetet anëtare të BE-së do ta dëgjojnë thirrjen tonë të zëshme për trajtimin e ndershëm të Kosovës dhe qytetarëve të saj dhe të na japin liberalizimin e vizave pasi të jenë përmbushur të gjitha kriteret”, ka thënë Osmani.