Presidentja e Kosovës, Vjosa Osmani, ka përkujtuar 28 dëshmorët dhe 32 martirët e Rakocit dhe Lagjes së Re në Kaçanik.

Ajo ka thënë se sakrifica e tyre është testament historie për rrugën deri te liria.

“22-vjet më parë, forcat e regjimit gjenocidal serb ia mësynë Rakocit dhe Lagjes së Re në Kaçanik. Në Betejën e 9 prillit të vitit 1999 për mbrojtjen e pragut të shtëpisë ranë 28 dëshmore e dëshmorë dhe 32 martirë. Pjesëtarë të Brigadës 162 ‘Agim Bajrami’, të UÇK-së, e deshën lirinë dhe u flijuan për të. Sakrifica e tyre është testament historie për rrugën deri te liria. Sot i kujtojmë me nder e respekt gjithë ato gra e burra, të cilët janë shtyllë e fuqishme e lirisë, pavarësisë dhe e shtetit tonë. Përveç tjerash, Beteja e 9 Prillit dëshmoi edhe për guximin dhe  kontributin e grave për lirinë e vendit. Në altarin e lirisë, këtë ditë ranë: Lumnije Raka, Jehona Raka, Emsale Frangu, dhe Mukadeze Muhaxheri-Lika. Qoftë i përjetshëm kujtimi për dëshmoret, dëshmorët e martirët!”, ka shkruar Osmani në llogarinë e vet në “Facebook”.