![](https://www.epokaere.com/wp-content/uploads/2018/05/vjosa-osmani-e1449590359758-1-650x358.jpg)
Osmani përkujton masakrën e Izbicës: Drejtësi për Dafinën gjashtëmuajshe
Deputetja dhe kandidatja për presidente, Vjosa Osmani, ka përkujtuar sot masakrën e Izbicës.
Në 22-vjetorin e kësaj masakre, ajo ka kërkuar drejtësi për vogëlushen gjashtëmuajshe Dafina Qelajt dhe 146 viktimat tjera që janë vrarë nga forcat serbe në këtë masakër.
Postimi i plotë i Osmanit:
Drejtësi për Dafinën 6-muajshe!
Sot bëhen 22 vjet nga masakra e Izbicës, kur forcat ushtarake e policore të regjimit gjenocidal të Serbisë, vranë një vajzë gjashtë muajshe dhe 146 djem e burra.
Eshtrat e Dafina Qelajt janë gjetur në varrezën masive të Petrovo Selos në Serbi më 2017. Në po të njëjtin vit, ajo është rivarrosur në varrezat e Izbicës.
Historia e Dafinës nuk është vetëm e saj. Është edhe e mbi njëmijë fëmijëve të vrarë në luftën e Kosovës, nga të cilët 109 ende rezultojnë të zhdukur.
Kjo histori është dhimbja jonë. Në çdo 28 mars, kujtimi për këta njerëz që u privuan nga jeta vetëm pse ishin shqiptarë është rikujtim për adresim të përgjegjësisë së kryerësve, është thirrje për drejtësi, është kujtesë historike dhe personifikim i mbijetesës!
Në dekadën e dytë që prej se jemi të lirë, duhet të reflektojmë për rrugën që kemi kaluar, sepse Masakra e Izbicës është dëshmia para së cilës duhet të përkulemi të gjithë dhe para së cilës duhet marrim forcën për të thënë dhe kërkuar të drejtësinë.
E mbi të gjitha drejtësi për Dafinën!
Qoftë i përjetshëm kujtimi për të rënët në Masakrën e Izbicës!