Presidentja e Kosovës, Vjosa Osmani, ka marrë pjesë në ceremoninë e rreshtimit të kuadrateve të FSK-së, me rastin e shënimit të “Epopesë së UÇK”-së, 25-vjetorit të rënies së familjes Jashari, në natën mes 4 dhe 5 marsit të vitit 1998.

Osmani ka thënë se ajo ngjarje e ka ndryshuar rrjedhën e historisë së Kosovës dhe “i tregoi botës se çfarë mund të arrijë një popull”.

“Kjo liri dhe ky shtet mbajnë vulën e komandantit legjendar Adem Jashari, familjes së tij dhe të 3 mijë dëshmorëve të Ushtrisë Çlirimtare të Kosovës dhe mijëra luftëtarëve që i kemi edhe sot mes nesh”, ka thënë ajo, duke shtuar se “ne u detyrohemi atyre”.

“Do ta nderojmë kujtimin për ta duke ruajtur dhe kultivuar vlerat për të cilat ata ranë”, ka thënë presidentja Osmani.