Presidentja e Kosovës, Vjosa Osmani, njoftoi se është takuar me homologun e saj kroat, Zoran Milanoviq, ku tha se ky shtet mbetet aleati i çmuar i Kosovës në fushën e mbrojtjes dhe të sigurisë rajonale.

Osmani tha se në takimin e zhvilluar në Sofje e uroi Milanoviqin për rizgjedhje në këtë post, derisa shtoi se ai është mbështetës i fuqishëm i Kosovës. Ajo u shpreh se me miq si Kroacia, Kosova përditë është më e fortë.

“Kroacia mbetet aleate e çmuar e Kosovës në fushën e mbrojtjes dhe sigurisë rajonale. Prandaj, sot në Sofje takova mikun dhe mbështetësin e fuqishëm të Kosovës, Presidentin e Kroacisë, Zoran Milanović, të cilit i përcolla urimet më të përzemërta për rizgjedhjen në këtë post. Me Kroacinë bashkëpunojmë në mbrojtje, në ekonomi dhe në çdo fushë tjetër, sepse raporti ynë është i bazuar në besim reciprok. Me miq si Kroacia, Kosova është çdo ditë e më e fortë”, ka shkruar Osmani në Facebook.

Më 18 mars, Kosova, Shqipëria dhe Kroacia kanë nënshkruar Deklaratë trelaterale për aleancë ushtarake.

Nënshkrimi i këtij memorandumi u bë në Shqipëri, ku ministri shqiptar i Mbrojtjes, Pirro Vengu, me nderime të larta ushtarake ka pritur homologët e tij nga Kosova, Ejup Maqedonci dhe nga Kroacia, Ivan Anushiq.

Ministri i Mbrojtjes, Ejup Maqedonci, ka thënë se synimi i bashkëpunimit nuk është kërcënim për askënd, por mesazh për ata që synojnë të kërcënojnë rajonin.

“Synimi i këtij bashkëpunimi nuk është rast kërcënimi për askënd, është mesazh për ata qe synojnë të kërcënojnë rajonin, ne u tregojmë qe jemi së bashku dhe nuk do te lejojmë qe askush të destabilizon rajonin. Falënderoj ministrin e Shqipërisë dhe Kroacisë për ketë nisme, vlerësoj se kjo marrëveshje është e para trilaterale ne rajon. Edhe njëherë, kjo marrëveshje është Deklaratës, është mesazh për çdo vend i cili ka qellim destabilizimin, ne jemi bashke dhe presim qe te bashkohen edhe vende te tjera”, ka thënë Maqedonci.