Presidentja e Kosovës, Vjosa Osmani nga kazerma “Adem Jashari” në “Ditën e Forcës”, ka thënë se FSK-ja është e gatshme t’i bashkohet ushtrive aleate të NATO-s.

Ajo ka thënë se forcat e Kosovës janë të trajnuara me standardet më të larta të NATO-s dhe se i kontribuon paqes në rajon.

“Forcat e Sigurisë japin kontribut për paqe e siguri në rajon, por edhe përtej, duke shërbyer së bashku me forcat amerikane, britanike dhe ushtritë tjera aleate nëpër vende të ndryshme të botës në misione paqeruajtëse dhe kështu duke e dëshmuar se tashmë është e gatshme t’i bashkohet ushtrive tjera aleate në Aleancën më të fuqishme në historinë e njerëzimit, në NATO”, ka thënë Osmani.

Osmani ka thënë se është derdhur shumë gjak që Kosova të ketë ushtrinë e saj, prandaj edhe ushtarët aktualë janë krenarë që mbajnë uniformën e FSK-së, për të cilën, sipas saj janë të gatshëm të japin edhe jetën nëse është e nevojshme.

“Sot dita e FSK-së dhe është ditë krenarie për secilin qytetar të Republikës së Kosovës. Është ditë kur ne me shumë krenari kujtojmë sakrificën jashtëzakonisht të madhe të popullit tonë, të Ushtrisë tonë Çlirimtare për të ardhur deri në këtë ditë. Është derdhur shumë gjak në mënyrë që Kosova ta ketë ushtrinë e saj, prandaj jam i bindur që secili ushtar dhe secila ushtare e mban këtë uniformë me shumë krenari dhe është i gatshëm të japë edhe jetën për atdheun, në qoftë se është nevoja”, ka thënë Osmani.

Si komandante supreme e FSK-së, Osmani ka thënë se çdo kund dhe në çdo cep të botës shihet se sa me admirim vlerësohen sukseset e kësaj ushtrie, prandaj jam jashtëzakonisht krenare me të.

Ajo ka thënë se bashkë me kryeministrin Kurti dhe krerët e FSK-së angazhohen për mirëqenien e ushtarëve, për trajnimet dhe shkollimet shtesë të tyre “që ushtria jonë të arrijë maja më të larta”.