Kryetarja e Kuvendit të Republikës së Kosovës, Vjosa Osmani, ka pritur sot në takim përfaqësuesit e KOSTT-it, me rastin e zhvillimeve te fundit në lidhje me votimin e marrëveshjes së re të kyçjes KOSTT- ENTSO-E.

Në takim ishin prezentë Ilir Shala, kryeshef ekzekutiv i KOSTT-it, Kadri Kadriu, zëvendëskryeshef ekzekutiv dhe Visar Hoxha, menaxher i Zyrës Ligjore/sekretar i Kompanisë, si dhe anëtarë të kabinetit të kryetares.

Me këtë rast, kryetarja Osmani ka përgëzuar përfaqësuesit e KOSTT-it për arritjen e jashtëzakonshme dhe për punën profesionale të bërë në këtë drejtim.

Kryetarja Osmani ka thënë se votimi pozitiv për marrëveshjen e re të kyçjes në mes të KOSTT dhe ENTSO-E nga ana e Operatorëve te Sistemeve të Transmisionit të Evropës (që operojnë brenda asociacionit ENTSO-E), është një hap historik për vendin, e sidomos një zhvillim tejet pozitiv për zhvillimin e qëndrueshëm të sektorit të energjisë.

“Arritja e kësaj marrëveshjeje do të ndikojë dukshëm në përmirësimin e shërbimeve energjetike në vend, do t’i hap rrugë investimeve të reja në këtë fushë si dhe do të kontribuojë në bashkëpunimin energjetik rajonal. Mirënjohje e veçantë shkon për aleatët ndërkombëtarë, për mbështetjen e tyre të vazhdueshme, e në veçanti Qeverisë Gjermane dhe KfW, për investimet e rëndësishme në avancimin e rrjetit të transmisionit”, ka thënë Osmani.

Ndërsa nga ana e përfaqësuesve të KOSTT-it është vlerësua bashkëpunimi korrekt dhe profesional me Kuvendin e Kosovës, që njëherësh është edhe aksionar kryesor i KOSTT-it.

Është rikonfirmuar rëndësia e madhe e marrëveshjes së re për arritjen e pavarësisë energjetike, si dhe është theksuar rëndësia e mbështetjes së aleatëve ndërkombëtarë në përmbylljen e suksesshme të këtij procesi.

Në takim, palët kanë trajtuar dhe çështjen e vështirësive me të cilat po ballafaqohet sektori energjetik gjatë periudhës së pandemisë, adresimin e obligimeve dhe çështjeve financiare, si dhe është diskutuar mbi implikimet dhe sfidat që rrjedhin nga mungesa e bordit të drejtorëve të KOSTT, në operimin dhe menaxhimin e kompanisë.

Palët janë dakorduar për koordinim të vazhdueshëm për hapat të cilat do të ndërmerren në vijim, ndërsa kryetarja Osmani ka konfirmuar gatishmërinë e Kuvendit për mbështetje të vazhdueshme në të gjitha proceset vijuese.