Xhevdet Bajraj

Pëllumbat

qentë

pulat

lopët

kuajt

askush nuk i numëroi

pas përfundimit të luftës

Po ashtu as librat

dorëshkrimet

fotografitë

letrat e dashurisë

buzëqeshjet

ëndrrat

pllakat e gramafonit

shishet e alkoolit

cigaret

frigoriferët

televizorët

veturat

shtëpitë

Askush nuk i ka llogaritur

as sytë e nxjerrë

duart dhe këmbët e prera

dashuritë e pushkatuara

fëmijët e palindur

Shumica e zemrave shpëtuan

të fshehura aq mirë

brenda trupit të njerëzve

saqë as tani

pronarët e tyre nuk mund t’i gjejnë

kjo s’ka fare rëndësi tani

ata tashmë janë mësuar të jetojnë pa to

P. s.

Sipas rezultateve zyrtare

përveç njëzet mijë grave

dhe vajzave të dhunuara

forcat e armikut gjatë viteve 1998-1999

kanë vrarë 11 843 kosovarë

prej tyre 1 392 fëmijë

dhe 1 739 femra

Një pjesë e tyre u morën

në kamionë frigoriferë

në vendin e armiqve

varrosur në varre të përbashkëta

dhe mbi to ndërtuan motele

qendra tregtare

ose qendra sportive

(Nga libri “Kur qajnë hardhitë”, botuar nga “Armagedoni”, 2019)