Kandidatja për deputete nga Aleanca për Ardhmërinë e Kosovës, Lirika Pacolli, u ka bërë thirrje të rinjve që votojnë për herë të parë ose të dytë që të mos mashtrohen nga ata që e kanë zbrazur Kosovën.

Ajo ka theksuar se nuk ka nevojë për përvojë të gjatë politike për të kuptuar se nuk duhet votuar ata që i kanë detyruar të rinjtë të largohen nga vendi.

“Ne kemi nevojë për prijës që e duan Kosovën dhe punojnë për zhvillimin e saj, jo për ata që i shtyjnë të rinjtë të largohen dhe i përdorin vetëm si maskota tubimesh,” ka deklaruar Pacolli.

Duke iu drejtuar të rinjve 18-25 vjeç, ajo ka theksuar se kjo gjeneratë ka frymë perëndimore dhe aspirata të mëdha, prandaj nuk duhet të lejojë izolimin dhe politikat që e kanë dëmtuar vendin.

“Jemi bashkë, ky vend është i yni dhe do ta bëjmë më të fortë,” ka përfunduar ajo, duke kërkuar mbështetje për Aleancën me numrin 137 dhe 105.