Presidenti i Aleancës Kosova e Re (AKR) dhe deputeti i Kuvendit, Behgjet Pacolli, ka reaguar pas “kërcënimeve” të Gjykatës Kushtetuese, e cila është duke e trajtuar dekretin e presidentit Hashim Thaçi, në lidhje me mandatarin për formimin e qeverisë së re.

Pacolli ka thënë se Kushtetuesja nuk mund të kërcënohet nga askush, duke kërkuar nga presidenti Hashim Thaçi dhe kryeministri në detyrë, Albin Kurti, që t’i ndalin presionet.

“Shoh shumë deklarata dhe spekulime politike nga të gjitha anët, në lidhje me vendimin e radhës të Gjykatës Kushtetuese. Kjo duhet të ndalet. Kjo vlen për të gjitha palët që tentojnë të ndikojnë, veçanërisht për presidentin dhe Kryeministrin në detyrë. Gjykata Kushtetuese është një organ i lartë dhe i pavarur dhe nuk guxon të kërcënohet apo të ndikohet nga askush. Është tepër e rëndësishme që të respektohet pa marrë parasysh cili do të jetë vendimi. Unë, si president i vendit, e pata bëra këtë pa zhurmë fare. Ky shembull duhet të ndiqet edhe nga të tjerët”, ka shkruar Pacolli në llogarinë e vet në “Facebook”. (L.G/ Epoka e re)